خاطرات

به گیلان و رشتی جوانان سلام          به او ابر و باران و بوران سلام

به گیل و روباران و پورد و بجار            به قربان تی صدری و نام ندار

خرم موقعی بو او ایام دور                که خوردیم اما اشه با ماهی شور

فو و کولمه اشپلان چان سر           ماهی روده و سیم ، میدان سر

بجان تاچه ای سرخه خالو ددار        آغوز مغز گیروانکه ای چار زار

سلیمان دارا جاده را بو بلند            صدای سل بولبولی یک روند

همش کوچه سر داد زه ای چان بدوش    یخان کرف پیچ کودی یخ فروش

قوروق نیصفه شب زوزه شال زه ای         خروسخوان ، سوپور کوچه کیشخال زه ای

زغالی جلو پشت سر اسبه بار              فوقاستی سه تا پارس بار کنار

آوردی ای روز همیه یا سرچینا              دوستی اونی دوربر کیجه کا

بالاجا همش داد زه ای آی خبر            تی چوم کار کودی پوربو بازار سر

کترا ، موشورفه ، نمک یار ، زیبیل      کتله ، روشور ، تنگی ، سرشوره گیل

طبجه ، جبد ، لبله ، چانچو ، سبو     عرق گیر و دس دسمال و طاقچه رو

مج دانه و موشتوک و ماسخوری     لچک بهگلی ف گیشه لب آجوری

قوفول طاس و ساطور و کچه ایجا     قاشوق چوبی و لیف و چمچه ایجا

نهه بو نوخون و گمج سر به سر       دعا طاس و مازندرانی شکر

ته بشقابی پهلو سفیده لبو           آلوچه ایجا اربه و اشتالو

اورا داشتیدی دیدنی خوردنی         ارا سفره و بقچه و سوزنی

اوشنتر پیاز ریسه ای رج به رج      اشنتر تغارانه ماستان فرج

محلانه لب اردال و قولجماق       خوسانه یی یاله بضرب چوماق

ایتا پا بمیدان ایته دس بچک        ولی اویتا وینجی مانستن دوچک

ایتا فوش لک لک دایی زار زه ای   گامیش مانستن ایتا کله ای

زاکان با ارابه دی بید کوچه سر     پامرده همه باغ و بولاغه ور

دایی ان اونه ، ان اونه واویلان       جوخوس بازی و لپه بازی میان

روخانه کنار نیشتیدی خوفتیدی      ا داوور ، دوروشکه چیه گفتیدی

ایتا بو که با بیل و گرواز دومه          همش چوزه ای لای گرزک خومه

ایتا هول هولی اویتا کار جیرجیری    چی چی نی فورانی ، چی چی لاس گیری

عزازیل نترسه زپا تیر تمش              نه زهله کونه  از خیار و ولش

در اون روزگاران دلان شاد بو            کپور و سفید ماهی ازاد بو

چولی بو فراوان و دوم جونبانه          راب ایشکن ، سینه سرخه ، قرآن خوانه

چئیم تازه بشکفته خاله ، باره          دبکه زه ایم سیب داره خوج داره

اوشنتر چوچاق و کیجاواش دئیم       ایزه کامپوره ایپچه خالواش چئیم

دوشاب بج خمس یا جوکول خوردیمی  سیرابیج غذایه دوجول خوردیمی

کولی ، کیش بزه ، خربزه چان به چان   ایتا فیل کاهو هئیم یک قران

کونوش و گزر بالکه بالکه                    زه ایم همه شب تا کولی چاله کا

برنجی طاسه ، خیلی شربت دوبو        آمه دیل خوشی ایپچه دوبچه نوبو

 
                            *                 *                   *

ترا گم جوان قدیم و ندیم                     فوکون اشک حسرت به پهنای دیم

که هر چی بخوردیم اما یکسره             فـــــــــــــــــــــــوستاندره از دماغ پره

پوره باغ شعر دورون لیلکی                  پـــــــــــــــوخوستاندره نازنین گیلکی

الان رشتی نانه جیویشتن چیه             خکاره دورون بج وابیشتن چیه

و الان نانه فرق توشکه ز توشک             نانه بد واگردان داره پرمه خوشک

نه فرق جلیس گستن از گیل گیلی        نه تـــــــــوفیر وازوازه از ویل ویلی

اوخان از دوخان ، غش غش از دیل غشه      نه رابه ز رابه نه کش از کشه

غذایان چی گرمه کوشان سردیدی          چه چیزا نه صندوق سری بردیدی

نیمیز گیریه از فوزن نشناسه                  فل از ول ، جزن از فزن نشناسه

کولوش از کولوشکن ، جفل از چقر           شالان غوزه یه  از خو قیش کمر

لغت هر چی داشتیم آویر بوندره              گاز و کونه خورد و خمیر بوندره

از ا غصه می دیل ببو خون دیمیر              نوا پشته ای نان تی اشکونه جیر

تیانی دورونی پلا آش بوبو                        بج ایشکور بوبو پلفه جان خاش بوبو

پوره راه و نیمراه سر ول ولان                    زواله ســـــــــــــــــــــــــــرا ترکانه زلزلان

گوشان چفت و بسته ، نگاه جیندیره          اوشـــــــــــنتر نوشو چسبه پابوز گیره

ناره فند ریسمان تاب ویریس                     ناره چهچه بولبولا کوـــــــلکاپیس

کولی زای بوبو قسمت ایسپیله                 نه توت باغ پیدا نه شونده کله

گم و گورا بو او فوکون و فیشان                  نه منقل نه ماشه نه او آتشان

نه دوری نه آتشگیر آهنی                          نه زیر منقلی در اطاقان دینی

نه هفرنگ دارانه جور ، نه سیتی                 نه چایانه سر کرده خاله کیتی

سمنتی دو سکو ننه خانه دم                     سه لنگه ننه تا ایزه بوغ بدم

و عطار نره برگ و صمغ و گیا                     مه صفرا واوین و نه بادکش درا

خبر ناره هیچ کس ز دردان درد                  گیله تجربه هر چی داشتیم بمرد

ا روزانه جوشانده از تاب دکفت                  وارنگ بو و بهدله از داب دکفت

ا روزانه شب جغد بیخوابه بو                     اوشوم پر بزه کشکرت آبه بو

وا گیفتن به صد دیده اشکبار                    تورنگ و گیلان شاه ر پس مزار

فراموشا بو قل نهاران چیره                      دوروشکه ننه تاسیانه مــــــره

تحیر دیهاتی نیه شیرادوش                      تعجب که بقال بوبو شیر فروش

از آقای کریم یمینی نقل از کتاب گبلان نامه

ارسال یادداشت
لطفا نظرات خود را در مورد این مطلب در اینجا ثبت کنید.
نام:
وب سایت شما:
BBCode:
یادداشت
کد امنیتی: (کد مقابل را داخل کادر وارد کنید)*

اولین یادداشت برای این مطلب

v.1.4.6